İnfarktın yeni səbəbi müəyyən edilib

İnfarkt, insult və ürəyin işemik xəstəliyi – bu ölümlə daha çox nəticələnən patoloji proseslərdir. Onlardan yuxarı pilləni yalnız onkoloji xəstəliklər tutur. Məhz buna görə alimlər həmin sahədə dayanmadan tədqiqatlar aparırlar.

Beləliklə, amerikalı alimlər bir sıra kliniki tədqiqatlar apardıqdan sonra müəyyən ediblər ki, əvvəllər yaşanmış mənəvi sarsıntılar ahıl yaşlarda ürək-damar xəstəliklərinə, o cümlədən, infarkta gətirib çıxara bilər. O da qeyd olunur ki, bu xəstəliyin inkişafı əlamətsiz keçə bilər, ona görə də qəfil ölüm halı praktik olaraq gözlənilmədən qeydə alınır.                       

Alimlər çoxsaylı tədqiqatlara dair materialları təhlil edib belə bir nəticəyə gəliblər ki, uşaqlıq illərində keçirilən  sarsıntılarla daha yaşlı dövrdə yaranan problemlər arasında ciddi əlaqə var.           

Ürək fəaliyyətinə neqativ təsir edə biləcək psixoloji travmalara alimlər bunları aid ediblər: yaşıdlar tərəfindən ələ salma, seksual təcavüzlər, ailənin dağılması, valideynlərin alkohol və ya narkotiklərə qurşanması. Bu cür travmalar keçirən insanlarda ahıl yaşda koronar çatışmazlıq, hipertoniya, ikinci tip diabet və hətta piylənmə müşahidə oluna bilər.       

Problemin irsi tərəfi hazırda müəyyənləşdirilməyib. Ona görə də, bu sahədə tədqiqatlar hələ davam etdiriləcək.    

Əlbəttə, belə faktorların qarşısını almaq çətin ki, mümkün olsun, amma onlar arasında əlaqəni başa düşdükdən sonra gələcəkdə effektiv profilaktik müalicələr işləyib hazırlamaq olar ki, bunun da sayəsində təhlükəli xəstəliklərin inkişaf riski aşağı düşər.

© Materiallardan istifadə edərkən hiperlinklə istinad olunmalıdır.