Günə 4000 addım yaddaş və əqli imkanları yaxşılaşdırır

22 December 2017 18417

Hekim Tap xəbər verir ki, günə cəmi 4000 addım kifayət edir ki, diqqət və əqli imkanlarınız yaxşılaşsın. Bu, əsasən, 60 və daha çox yaşı olan insanlara aiddir. Tədqiqatlar göstərib ki, fiziki aktivlik yaşlı insanlarda koqnitiv imkanların aşağı düşməsinin və demensiyaların qarşısını almaq üçün çox vacib şərtdir. Koqnitiv imkanlar o vaxt aşağı düşür ki, insanlar informasiyanın həzm edilməsində və yadda saxlanılmasında çətinlik çəkirlər.

Beyinin həcmi və sıxlığı insanın əqli sağlamlığının obyektiv göstəriciləridir. Bu faktorları müxtəlif neyrovizualizasiya metodları ilə ölçmək mümkündür.

Alimlər iki il ərzində yaddaş problemi olan 60 və daha yaşlı 29 insan üzərində təcrübə aparıblar. Onlar yaşlı insanların fiziki aktivliklərini izləmək üçün akselerometrdən (hərəkəti və addımların gündəlik orta sayını ölçən cihaz) istifadə ediblər. Tədqiqat iştirakçıları iki qrupa bölünüblər: bir qrupa günə 4000 addımdan çox yeriyən, digərinə isə qalan iştirakçılar aid ediliblər. Təcrübədə iştirak edənlər bir sıra neyropsixoloji testlərdən keçmiş, onların beyinlərinin MRT skanı çəkilmişdir. Məlum olmuşdur ki, gün ərzində 4000 addımdan çox yeriyən insanlarda hippokamp ( baş beyinin emosiya və yaddaşa cavab verən hissəsi) daha az yeriyən insanlardan daha sağlam, hippokampətrafı toxumalar isə daha sıxdır.

Eksperiment iştirakçılarının aktiv qrupu diqqət, informasiyanın həzm edilməsi, yaddaş və plan qurmaq və hədəflərə çatmaq kimi testlərdən də daha uğurla keçiblər.