Osteopatiya müalicə üsulu nədir?

Müəllif: Osteopat Elfanə Süleymanova 26 Mart 2020 7988

Osteopatiya əl ilə tətbiq olunan, vücudun özünütənzimləmə mexanizmini üzə çıxaran müalicə sistemidir. İlk dəfə 1874-cü ildə Amerikada Andrew Taylor Still (1828-1917) tərəfindən icad olunmuşdur. Osteopatiya üsusilə ağrılı nahiyələr üzərində tətbiq olunur. Narahatçılığın qaynağı təyin edilərək aradan qaldırılır. Bu müalicə üsulu vücuddakı yumşaq toxumalarda olan gərginlikləri və onunla əlaqəli olan funksiya pozulmalarını təsbit edərək müalicə edir.

Osteopatiya hansı vəziyyətlərdə tətbiq olunur?

Osteopatiya onurğa nahiyəsindəki ağrılar başda olmaqla, oynaq ağrılarının müalicəsində və bir sıra digər patologiyalarda effektlidir. Həmçinin qamət pozulmalarının bərpasında, oynaqların funksiyalarının geri qaytarılmasında da əhəmiyyətlidir.

Osteopatiya müalicə üsulunun istifadə edildiyi nahiyələr:

Onurğa, əzələ-skelet sistemi

Fəqərəarası disk sürüşmələri

Boyun ağrıları, bel fəqərəarasıdisk yırtığı ilə əlaqəli ağrılar

Oynaqlarda hərəkət məhdudluğu

Qamət pozulmaları

Miqren tipli baş ağrıları

Qəza nəticəsində yaranan baş ağrıları (Whiplash sindrom)

Stresslə əlaqədar yaranan əzələ ağrıları

Yuxusuzluq

Həzm sistemi, tənəffüs sisteminin funksional pozulmaları

Hamilə qadınlarda beldə ağrı sindromları

Gicgah çənə oynağı problemləri

Allergik xəstəliklər

Kəskin bağırsaq spazmları

Boyun, bel, diz vücudda yaranan problemin ilk təsir etdiyi nahiyələrdir. Məsələn, qaraciyərdə problem olduğu zaman sağ çiyin oynağında ağrılar, hərəkət məhdudluğu yarana bilər. Qaraciyər problemi həll olunmadıqca çiyin arıları aradan qalxmayacaqdır.

Osteopatiyada müalicə müddəti xəstəyə və yaşa görə dəyişir. Adətən osteopatiya prosedurları arasında 3 gün fasilə olur, əksər hallarda isə həftədə 1 dəfə təkrar olunur. Bəzi simptomlar bir seansda bitdiyi halda bəziləri üçün bir neçə prosedura təyin oluna bilər. Simptomlar azaldıqca seans sayıları 6 aydan bir təkrarlanır. Pasientə evdə sağlam qidalanma, müəyyən rejimlər tövsiyyə olunur.