Allerqoloq-immunoloq Əzizov Pərviz Faraqat oğlu ilə müsahibə

Aprelin 28-i HekimTap-ın təşkilatçılığı ilə Mayomed Medical Fizioterapiya və Reabilitasiya Mərkəzində  allerqologiya və immunologiya üzrə seminar baş tutdu. Seminar Avropa allerqologiya-immunologia akademiyasının və Rusiya klinik immunologiya və allerqologiya asosasiyasının həqiqi üzvü, həkim allerqoloq-immunoloq Əzizov Pərviz Faraqat oğlu tərəfindən keçirildi. Mövzu ətrafında yüksək səviyyəli müzakirələr aparılaraq ən son tibbi yeniliklər barədə söhbət edildi.

Seminardan sonra həkimlə olan müsahibəni təqdim edirik:

 – Pərviz bəy istərdik ilk olaraq özünüz barədə məlumat verəsiniz.

 – Mən Azərbaycan Beynəlxalq Universiteti, tibbi biologiya fakültəsini bitirmişəm. Daha sona Rusiyaya köçmüşəm. İmmunologiya institutunda təhsilimi davam etmişəm. Rusiya Federasiyasında İmmuniologiya universitetində “bronxit astma” şöbəsində işləmişəm. 2 il ərzində Allerqologiya və kliniki İmmunologiya institutunda da işləmişəm. Sonra Rusiya allerqoloqlar  və immunuloqlar Assosasiyasının  üzvü olmuşam. Daha sonra Rusiya uşaq allerqoloqlar və  immunuloqlar assosasiyasına üzv olmuşam. Daha sonra Avropa allerqoloqlar və immunuloqlar  akademiyasına üzv seçilmişəm. Keçən il Amerika allergiya, astma, immunulogiya assosasiyasına üzv olmuşam. Xarici konfranslarda iştirak edirəm.

 – Azərbaycanda baş tutan ilk seminarınızdır?

 – Azərbaycanda ilk dəfə seminarda iştirak edirəm. Çox məmnunam ki belə bir şans yarandı.

 –  Azərbaycanlı allerqoloqların fəaliyyəti barədə nə düşünürsünüz?

 – Buradakı həkimlər barədə çox maraqlanmamışam. Eşitmişəm sadəcə. Bu sahə üzrə nə qədər həkim çox olsa o qədər yaxşıdır.

 – Sizcə ekoloji vəziyyət alergiyaya çox təsir edir?

 – Siz ekoloji vəziyyətə diqqət yetirsəniz görərsiniz ki nə qədər vəziyyət çətindir. Belə getsə düşünürəm Azərbaycanda 15-20 ildən sonra xəstələrin sayı ən azı 3-4 dəfə artacaq. Çünki hazırda Bakıda ekoloji vəziyyət çox pisdir.

 – Sizcə azərbaycanlı allerqoloqlarla xaricilərin fərqi nədir?

 – Bizdə belə mütəxəssislərin sayı azdır. Əsas problem budur. Əhali sayına görə allerqoloqlar çox azdır.

 – Əksər zaman bütün allergiyadan əziyyət çəkən pasiyentlərə standart dərman preparatları yazılır. Bu doğrudurmu?

 – Xeyr təbii ki. Standart dərmanların yazılması hər zaman doğru deyil. Məqsədəuyğun deyil. İstənilən dərman yazılan zaman xəstənin bütün əlamətləri nəzərə alınmalıdır.

 – Hər qaşıntını allergiya adlandıra bilərikmi?

 – Bəzi həkimlərin adlandırdıqları allergiya hər zaman allergiya deyil. Məsələn, xəstənin bədənində qaşıntı varsa ona allergiya diaqnozu qoyulur. Amma qaşıntı ən az 100 xəstəlikdə təsadüf edilə bilər. Ona görə hər qaşıntını allergiya adlandıra bilmərik.

 – Bitkidən və ya hansısa qidadan asılı olaraq yaranan qaşıntının səbəbi allergiyadırmı?

 – Məsələn, əncir ağacının şirəsinə demək olar ki hər insan eyni reaksiya göstərir. Hər zaman allergiya kimi qələmə almaq təbii ki doğru deyil. Məsələn gicitkan da qaşındırır. Buna allergiya demək olarmı?

 – Valideynlərdə allergiya xəstəliyi varsa övlada keçə bilərmi?

 – 100 faiz övlad da allergiyalı olacaq deyə bilmərik amma risk payı çox yüksəkdir.

 – Allergiyadan əziyyət çəkənlər ömürlərinin sonunadək dərman qəbulunu etməlidirlər?

 – Bu xəstənin vəziyyətindən asılıdır.. Yəni baxır pasiyent hansı xəstəlikdən, xəstəliyin hansı növdən əziyyət çəkir. İndividualdır.

 – Sizcə bu sahə üzrə ən qabaqcıl müalicə növü hansı ölkədədir?

 – Avropa ölkələrində. Avstraliya, Kanada, Yaponiya, İtaliya və s. Müasir protokolların mənimsənilməsindən çox şey asılıdır. 

 – Doktor, Azərbaycana yenidən gəlməyi düşünürsünüzmü?

 – Səfərim çox gözəl keçdi.  Vətənimdəki insanlara yenidən xidmət göstərmək üçün məmnuniyyətlə gələcəm.

 

© Materiallardan istifadə edərkən hiperlinklə istinad olunmalıdır.

"Sübut olunmuş təbabət nöqteyi nəzərindən allergik xəstəliklərə müasir yanaşma" mövzusunda keçirilmiş tədbirdən foto qalereya: