Psixoloji problemli uşaqların valideynlərilə görüş keçirildi

Səlis Danışıq Loqopedik və Psixoloji Mərkəzində “HəkimTap”ın təşkilatçılığı ilə 2012-ci ilin "Yılın Düşünce Adamı" mükafatına layiq görülmüş, 10-dan çox kitabın müəllifi, 20-dən çox seminar və təlimlərin təşkilatçısı Uzman psixoloq Kazım Yurdakul autizm, əqli gerilik, fobiyalar, sosiopatiya, şizofreniyadan əziyyət çəkən uşaqların valideynləri ilə görüş keçirib. 20-dən çox valideynin iştirak etdiyi görüş maraqlı müzakirələr şəraitində keçib.

Valideynlər səhhətində psixoloji problemləri  olan övladları ilə münasibətdə yaranan çətinliklərini uzmana danışıblar. Tanınmış psixoloq uşaqların düzgün tərbiyəsinə, cəmiyyətə adaptasiyasına, fobiyaların aradan qaldırılmasına dair dəyərli məsləhətlər verib. Tədbirin sonunda valideynlər Kazım Yurdakulun qəbuluna yazılıb, uzmanla xatirə şəkilləri çəkdiriblər.

Səlis Danışıq Loqopedik və Psixoloji Mərkəzin direktoru, peşəkar loqoped-defektoloq Xavər Abdullayeva tədbirlə bağlı fikirlərini bölüşüb: “Bu cür əhəmiyyətli tədbirin təşkilatçılığına görə “HəkimTap” komandasına təşəkkürümü bildirmək istəyirəm, arzu edirəm ki, belə maraqlı və əhəmiyyətli görüşlər tez-tez keçirilsin. Mən işimlə bağlı psixoloji problemləri olan uşaqların valideynləri ilə mütəmadi olaraq görüşürəm. Adətən onlar mənəvi əziyyət çəkir, çox vaxt övladları ilə düzgün kontakta girə bilmir, onları cəmiyyətdən təcrid edirlər. Bu günkü görüşdə Kazım bəy valideynlərə bir daha sübut etdi ki, psixoloji və psixi problemləri olan uşaqların da cəmiyyətə inteqrasiya olmağa, dolğun həyat yaşamağa haqları var ”. 

Onu da qeyd edək ki, Kazım Yurdakulun iştirakı ilə gələcəkdə də seminar və görüşlərin keçirilməsi planlaşdırılır.

Tədbirin foto şəkilləri: